CUCUSIÑA

“Había portas por tódolos lados da sala, pero estaban todas pechadas, e cando Alicia a tivo percorrida dun lado a outro e tanteadas unha a unha as súas portas, encamiñouse tristemente cara ao centro, pensando como se apañaría para saír.”

Este piso é un exemplo tipo do mercado inmobiliario do seu momento: “piso con tres habitacións, unha en suite, cociña con tendedeiro, salón-comedor, boas calidades, céntrico.”

Na primeira visita anotamos como puntos fortes a boa superficie, a triple orientación, a luminosidade, a ventilación cruzada e as vistas, pero nada diso destaca debido á excesiva compartimentación, unha distribución pouco meditada e uns acabados pouco lucidos.

Decidimos abrir un gran espazo central de vida, ao que se accede inmediatamente dende a entrada. Un panel de madeira, tinguida en cor verde como elemento focal, oculta un armario empotrado e o acceso á segunda zona do piso, de dormitorios e baño. Os espazos seguen a estar marcados pola distribución dos ocos. A viga descolgada que remata en piar, o faldón do baixocuberta e o debuxo dos pavimentos son os elementos que dividen e ordean este gran espazo central, sen necesidade de portas nin paredes.