YAYO DAPORTA

A parcela constaba de varias edificacións, entre elas un restaurante. Este local, galardoado cunha estrela Michelin dende o ano 2008 e especializado en produto de proximidade actualizado e reinterpretado, conta cunha boa cociña anexa á sala de xantar, pero a diversificación do negocio fixo necesario ampliar a zona de preparación.

O conxunto está catalogado con protección integral coa categoría de pazo, polo que a nosa actuación tentou ser o máis discreta e integradora posible. Proxectamos unha edificación secundaria, de apoio ao uso de restauración. Un volume trapezoidal, adaptado á configuración espacial da parcela, anexado á medianeira norte veciña, de tal xeito que mantén un espazo libre de xardín, rodeado polo muro enreixado orixinal que abriga o cruceiro e o hórreo.

O novo anexo contén un acceso para salas de preparación de alimentos (sala fría e sala de elaboración), cámaras frigoríficas e vestiario para persoal. Empregamos a madeira modificada termotratada de pino como acabado continuo. Esta elección responde a criterios de integración, de estética, de mantemento, de mellora da eficiencia enerxética e de sostibilidade. A continuidade en cuberta permite o seu uso como pequena horta, na que Yayo medra froitas e hortalizas coas que se autoabastece, e así, a arquitectura e a hostalaría danse a man nun mesmo proxecto respectuoso e responsable.