FEFIÑÁNS

Miña nai naceu e viviu nesta praza, situada a 200 metros do meu despacho e para min é, sen dúbidas, a praza máis bonita do mundo.

Ten especial relevancia dentro do tecido de Cambados, por pertencer a un entorno BIC. Fora evolucionando, sobre todo nos últimos anos, cara a unha peonalización, pero faltáballe aínda unha reorganización: mobiliario, iluminación, sistemas de drenaxes e recollidas de auga, zonas de lecer…

En xeral, as obras a realizar pretendían ser o máis discretas posibles: limpar, ordenar, renovar instalacións, homoxeneizar mobiliario, iluminar axeitadamente… pero dúas das actuacións necesitaban ser máis rotundas.

Por unha banda a entrada norte, antes de acceso para o tráfico rodado. Transformámola nun pequeno espazo de lecer, con árbores autóctonos que enmarquen a entrada, uns bancos á súa sombra, un pavimento drenante que permita o uso peonil e tamén o acceso rodado puntual e, por suposto, a escultura do guerreiro sempre vixiando. A outra, máis relevante, foi a reconstrución da antiga escalinata lateral da igrexa de San Benito, remodelada nos anos 70 para colocar un balcón con dobre escaleira que ofrecese máis espazo e comodidade para o paso de vehículos. Aínda que esta actuación estaba ben executada e era respectuosa, a solución plantexada empobrecía, dende o noso punto de vista, a configuración espacial da praza. Agora que tiñamos devolto ao peón o espazo fronte ao coche, era momento de recuperar a escalinata como zona de estancia. Cando nos plantexamos recolocala na súa posición orixinal descubrimos, ademais, que a rúa Real gaña ese punto focal na porta sur da igrexa, enmarcando a praza coas escaleiras ao fondo que invitan a subir e contemplar o espazo dende a altura, ou descansar un anaco nos seus chanzos. A nova reorganización da iluminación e mobiliario, aliñados coas zonas arboradas, axudan a remarcar estes eixos.

Nesta obra a reutilización era unha práctica necesaria. Tiñamos gran parte do material, só tiñamos que reorganizalo. Nada sobra, nin unha pedra, para todas elas hai un sitio.

A renovación dun espazo urbano leva implícitos unha morea de condicionantes, por iso, cando se dubida, hai que volver a preguntarse cal é o verdadeiro “interese xeral” todas as veces que sexan necesarias, porque aí está a solución correcta. Confiamos en que a nosa actuación responda aos intereses de todas as persoas de Cambados, que a usen e a vivan para gastar as novas pedras ata que se confundan coas vellas.